-->

السبت، 26 نوفمبر 2016

كيفية كتابة موضوع التعبير للمرحلة الابتدائية

من الحاجات اللى بتلخبطنا كتابة موضوع تعبير فى الصف الرابع الابتدائى وما بعده

أولا .. لأنه مالهوش قواعد ثابتة تتحفظ و تتذاكر .. 
و ثانيا .. لأن درجاته نسبية و معظم الأحيان بتعتمد على المصحح ..

طيب خلينا نضع قواعد و أساسيات لكتابة موضوع تعبير مع أولادنا يقدروا من خلالها يكتبوا موضوع متكامل بغض النظر عن قيمته الأدبية اللى هانتكلم عنها كمان ..

** أول خطوة لتعليم طفل يكتب تعبير إنى أطلب منه يجيب أربع أو خمس جمل منفصلة عن موضوع معين .. يعنى بيربطها موضوع واحد .. و بكدة يتعلم إنه بمجرد ما يقرأ رأس السؤال يبدأ يرتب فى دماغه الأفكار الرئيسية اللى هايتكلم عنها ..

** لما يتعلم ده كويس هابدأ أعلمه ازاى يربط الجمل دى ببعض علشان تبقى مقال مترابط زى الدرس اللى بياخده فى المدرسة كدة ..
و الأفضل لو الموضوع يسمح إنه يتعمل فى شكل قصة أخليه يعملها قصة لغاية ما يبدأ يتعود على ربط الجمل و ترتيبها ..
و قبل ما أبدأ أضيف شيء من المتعة و الخيال للطفل علشان ما يتعقدش .. مثلا هاقول له .. انت دلوقتى اتحولت لصحفى مشهور فى جريدة و قرائك مستنيين منك مقال عن الموضوع الفلانى ..
أو تخيل انك بعصاية سحرية تحولت لبطل القصة اللى هايكتبها .. وابدأ احكيلنا عملت ايه ..

** ثالث خطوة بقى و دى مهمة جدا .. لازم أعلمه يرسم شكل محدد لموضوعه فى دماغه قبل ما يكتبه .. بمعنى ..
هاقول له اعتبر اللى انت هاتكتب له الموضوع ده مايعرفش أى حاجة عنه خااااااااالص .. فانت هاتبتدى تقول له مقدمة عن الموضوع .. يعنى تعرفه الموضوع ده هايتكلم عن إيه ..
بعد كدة يحدد الأفكار اللى هايتكلم عنها فى الموضوع و قدام شوية ممكن نعلمه يكتبها فى هامش أو مسودة بقلم رصاص علشان يكون مرتب ..
نطلب منه يتكلم عن كل فكرة باللى هو عاوزه أو يشرحها فى سطر واحد بس ..
آخر حاجة هانطلب منه جملة ينهى بيها كلامه يقول فيها الخلاصة أو اللى اتعلمناه من المقال اللى كتبه ..

~~~~~~~~~~~~~~~~~~~~~~~~~~~~~~

كدة الموضوع خلص .. لكن فى شوية ملحوظات مهمة جدا جدا ليك يا ماما لازم ناخد بالنا منها ..

أولا ..
____
موضوع التعبير
محتاج ملكة أدبية و تعبيرية و قدرة من الطفل على صياغة أفكاره فى شكل منظم و جميل .. واستخدام عبارات و ألفاظ جميلة ..
و كل ده ساعات بيكون موهبة ربانية فى الطفل و ساعات لأ .. و بيعتمد على طريقة تربية الطفل و مدى استماع باباه ومامته له و احترامهم لكلامه من صغره .. و كمان مدى ثقته فى نفسه ..
معنى كدة إنى مش هالاقى ابنى فى يوم وليلة بيكتب أحلى موضوع تعبير .. 
الموضوع محتاج تدريب كتير جداااااااااااااااااااااا و مواضيع مختلفة و تعليمه أساليب و عبارات مختلفة و جديدة .. أنا عارفة إن مفيش وقت بس ممكن نعمل ده فى الأجازة و بدون استعجال ..

ثانيا .. و دى أهم حاااااااااااااااااااااااجة فى الموضوع كله ..
_______________________________________

أنا بارفض رفضا تااااااااااااااااااما تحفيظ الطفل مقدمة و خاتمة محددين يكتبها ..
و أنا شخصيا لو باصحح ولقيت طفل كاتب كدة هانقصه فى الدرجات على طول .. مش رخامة والله ..
بس لأننا كدة بنخلق إنسان نمطى و تابع مابيفكرش ولا يبتكر و لا حتى بيشغل عقله .. هانخلق جيل واخد على التلقين و اتباع الموجود من غير أى تفكير .. و فى رأيى دى جريمة فى حق أولادنا ..
و احنا بنتعب هنا سوا كل التعب ده علشان نخرج شباب واعى محترم .. قادر ومبدع .. يقدر يشيل البلد دى و يعدلها بعد عشرين سنة .. فبلاش نهد كل ده بأسلوب خطأ ...

لتحميل موضوعات تعبير جاهزة أكثر من 30 موضوع من هنا



لمتابعة الجديد دائما انضم لجروبنا ( معلم وطالب أون لاين )

أو ابحث عنا فى google  اكتب  معلم وطالب اون لاين 

ملحوظة : جميع منشوراتنا يتم تجميعها من الإنترنت عن طريق أسرة الجروب والمدونة وبالتالى فهى حصرية ولن تجدها مجمعة بهذا الشكل فى أى جروب أو موقع تعليمى وذلك تيسيرا على أولياء الأمور خاصة قليلى الخبرة بالإنترنت 
تعليقات فيسبوك
0 تعليقات بلوجر

ليست هناك تعليقات:

إرسال تعليق

كافة الحقوق محفوظةلـ معلم وطالب أون لاين 2016